მოსაზრება: ელჩთან შეხვედრაზე უარი ნიშნავს, რომ ის არ არის მზად მოთხოვნების დასაკმაყოფილებლად
ვალერი ჩეჩელაშვილის მოსაზრება
საელჩოს 5-სტრიქონიან განცხადებაზე 3-გვერდიანი განმარტება ცხადყოფს, რომ ივანიშვილს შექმნილი ვითარება აწუხებს, თუმცა ელჩთან შეხვედრაზე უარი ნიშნავს, რომ ის არ არის მზად მოთხოვნების დასაკმაყოფილებლად – ამის შესახებ “სტრატეგიული ანალიზის ცენტრის“ გეოპოლიტიკური კვლევების ხელმძღვანელმა, ვალერი ჩეჩელაშვილმა “დღის ნიუსრუმში“ სტუმრობისას განაცხადა.
როგორც ჩეჩელაშვილმა განმარტა, ბიძინა ივანიშვილის უარი აშშ-ის ელჩთან, რობინ დანიგანთან შეხვედრაზე, “შეცდომა“ იყო.
აშშ-ის საელჩო აცხადებს, რომ სახელმწიფო მდივან რუბიოს თხოვნით, 22 მაისს, ელჩმა დანიგანმა ბიძინა ივანიშვილთან შეხვედრა ითხოვა, სადაც მას ტრამპის ადმინისტრაციის გზავნილი უნდა მოესმინა. მათივე ცნობით მიწვევა ივანიშვილმა არ მიიღო.
“სახელმწიფო მდივან რუბიოს თხოვნით, 22 მაისს, ელჩმა დანიგანმა ბიძინა ივანიშვილთან შეხვედრა ითხოვა, რათა შეეტყობინებინა ადმინისტრაციის გზავნილი და კიდევ ერთხელ გადაეცა კონკრეტული ნაბიჯების შესახებ, რომელთა გადადგმაც საქართველოს მთავრობას შეუძლია იმის საჩვენებლად, რომ სერიოზულად არის განწყობილი შეერთებულ შტატებთან ურთიერთობის გადატვირთვის მიმართ. იმედი გვაქვს, საქართველოს მთავრობას გულწრფელად სურს ამერიკასთან და ამერიკელ ხალხთან 33 წლიან პარტნიორობასა და მეგობრობას დაუბრუნდეს”, – აცხადებს საელჩო.
მეორე დღეს ბიძინა ივანიშვილმა წერილით უპასუხა ამერიკის საელჩოს განცხადებას. მისი თქმით, პირადი შანტაჟის ფონზე, აშშ-ს ელჩთან შეხვედრა არასწორად მიაჩნია.
ვალერი ჩეჩელაშვილი: “ეს პასუხი ცხადყოფს, რომ შექმნილი ვითარება ბიძინა ივანიშვილს აწუხებს. საელჩოს მიერ გაკეთებულ 5-სტრიქონიან განცხადებას 3-გვერდიანი ახსნა-განმარტებით უპასუხა. თან ძალიან იშვიათი შემთხვევაა, როდესაც ადამიანი აღიარებს, რომ რაღაც კომპლექსებთან აქვს საქმე, მაგრამ მთავარი ჩემთვის ისაა, რომ საბოლოოდ, ბიძინა ივანიშვილმა შეხვედრაზე უარი თქვა.
შესაბამისად, ეს ნიშნავს იმას, რომ იმ მოთხოვნების დაკმაყოფილებისთვის, რომლებსაც ელჩი მასთან შეხვედრაზე გააჟღერებდა, ის მზად არ არის. ჩვენ ყველამ ვიცით, რა მოთხოვნებია ეს და ის გამოიხატება სამ სიტყვაში: კანონები, პატიმრები, არჩევნები. შესაბამისი გზავნილი კარგად იყო მიწოდებული მაკა ბოჭორიშვილის მეშვეობით, რომელთანაც შეხვედრა ცოტა ხნის წინ შედგა.
იმის თქმა, რომ ოფიციალური არხები არსებობს და ელჩი მას რატომ არ იყენებს და რატომ უნდა შეხვედრა ბიძინა ივანიშვილთან, ასეთი რიტორიკაც გვესმოდა, ეს რეალობას არ ასახავს, რადგან ელჩი კლასიკური დიპლომატიური გზით წავიდა და უპირველესად, მაკა ბოჭორიშვილ შეხვდა.
მინდა ერთ გარემოებას გავუსვა ხაზი – არ არსებობს საელჩოს საგარეო პოლიტიკა. არსებობს დედაქალაქის საგარეო პოლიტიკა და ამ შემთხვევაში ვაშინგტონის, სახელმწიფო დეპარტამენტისა და ტრამპის ადმინისტრაციის პოლიტიკა, რომელსაც ელჩი ახორციელებს.
ის, რომ არ ექვემდებარებოდეს ინსტრუქციებს, რომლებიც ვაშინგტონიდან იგზავნება, მეორე დღესვე ეს ელჩი არ იქნებოდა. ეტყობა, პირველი შეხვედრის შემდეგ [ირაკლი კობახიძესთან] შეიძლება რაღაც იმედები გაუჩნდა ელჩს, მაგრამ არაფერი მოხდა, დასკვნები გამოტანილი არ იყო. შესაბამისად, ვაშინგტონში მიიღეს გადაწყვეტილება, რომ თუ ვინმესთან აზრი აქვს შეხვედრას, მხოლოდ ივანიშვილთან.
ამიტომაც იყო მოთხოვნილი ეს შეხვედრა, რაც არაფრით დამთავრდა. ვფიქრობ, შეხვედრა რომ არ შედგა, ეს იყო შეცდომა. ეს იყო შანსი, რომ „ქართულ ოცნებას“ გამოესწორებინა ის ვითარება, რაშიც თავად აღმოჩნდა და მასთან ერთად, მთელი ქვეყანა.
ეს არ არის სწორი. ის ალბათ, დარწმუნებულია, რომ რაღაც თანხებით ან ფინანსებით და მისი ამა თუ იმ მიმართულებით მიმართვით, შეიძლება აშშ-სთან ფუნდამენტური საკითხების გადაწყვეტა. ეს ასე არ არის. ფინანსური ბერკეტებით ამ პრობლემას ვერ დავძლევთ. ეს არის მხოლოდ „ქართული ოცნების“ მოქმედებების შედეგი. სხვას ვერავის დავაბრალებთ ამას. სრული პასუხისმგებლობა ამაზე „ქართულ ოცნებას“ ეკისრება. პასუხი არის სამ სიტყვაში, რომელიც უკვე მოგახსენეთ. ვფიქრობ, ეს მაკა ბოჭორიშვილთან ელჩის შეხვედრაზეც იყო გაჟღერებული, მაგრამ შედეგი ვერ ვნახეთ.
თუ ირაკლი კობახიძეს მიაჩნია, რომ მარკო რუბიო „დიფ სთეითის“ წარმომადგენელია და თუ მისი ამ შეფასებით მარკო რუბიოს დაპირისპირებას ცდილობს ტრამპთან, ეს მცდელობა არ იქნება წარმატებული. უნდა ვიცოდეთ ისიც, რომ სახელმწიფო მდივანი აღმასრულებელ ვერტიკალში ინსტიტუციურად მეორე პირია პრეზიდენტის შემდეგ.
რა თქმა უნდა, განსაკუთრებული პასუხისმგებლობა ეკისრება სახელმწიფო მდივანს საგარეო პოლიტიკის პრობლემებთან დაკავშირებით. მთავარი საკვანძო პირი, რომელიც გადაწყვეტს რა პოლიტიკა ექნება თეთრ სახლს და ზოგადად, ამერიკის ადმინისტრაციას საქართველოსთან მიმართებით, ამ მოვლენებზე განსაკუთრებული გავლენა ექნება მარკო რუბიოს. ამიტომ მისი დადანაშაულება იმაში, რომ ის ვიღაცის წარმომადგენელია ან ვიღაცის კარნახით მოქმედებს…
დამერწმუნეთ, ისეთი გამოცდილი პოლიტიკოსი და სახელმწიფო მოღვაწე, როგორიც რუბიოა, ნამდვილად არანაირ გავლენას არ ექვემდებარება. თუ ის რამეს ამბობს, მისი პოზიცია სრულად არის შეთანხმებული ტრამპთან.“
