საქართველოში თეოლოგი და ფილოსოფოსი ანდრეი კურაევი არ შემოუშვეს

 საქართველოში ანდრეი კურაევი არ შემოუშვეს

საქართველოში ცნობილი მართლმადიდებელი თეოლოგი და ფილოსოფოსი ანდრეი კურაევი არ შემოუშვეს. ამის შესახებ ინფორმაციას ტელეკომპანია ფორმულა ავრცელებს.

ფორმულასთვის ცნობილია, რომ ანდრეი კურაევს საზღვარზე გადასცეს საბუთი, რომლის თანახმადაც, მას 3 წლის მანძილზე საქართველოში შემოსვლა ეკრძალება. 

ანდრეი კურაევს თბილისში, სულხან-საბა ორბელიანის უნივერსიტეტში უნდა ჩაეტარებინა ლექცია, სახელწოდებით – “რუსეთის მართლმადიდებელი ეკლესიის საიდუმლო ისტორია – 100 წელი ავტოკეფალიურ განხეთქილებაში”. თუმცა, საზღვარზე შეაჩერეს და პასპორტი ჩამოართვეს.

ფორმულა ავრცელებს საბუთს, რომელიც ანდრეი კურაევს საზღვარზე გადასცეს:

კომენტარი

არქიმანდრიტ დოროთე ყურაშვილის თქმით, საქართველოში ცნობილი მართლმადიდებელი თეოლოგისა და ფილოსოფოსის ანდრეი კურაევის არშემოშვების ფაქტი მეტყველებს, რომ სახელმწიფო საზღვრებს რუსეთი აკონტროლებს.

“ეს ფაქტი თავისთავად მეტყველებს იმას, რომ ჩვენს სახელმწიფო საზღვრებს რუსეთი აკონტროლებს. ვინც მას უპირისპირდება, იმას ჩვენთან როგორ შემოუშვებდნენ, ხომ? არ შემოუშვეს. სხვა მას დანაშაული არ გააჩნია, არავითარი, არც რაიმე საზღვრის გადაკვეთის პრობლემა ექნებოდა, არაფერი, უბრალოდ ის დაპირისპირებულია რუსულ მიმართულებას, რა რეჟიმიც რუსეთშია, ასევე მისი ეკლესიის ქცევებს და ის თავისთავად გამოდის მათი მტერი და ვინც რუსეთის მტერია, ის საქართველოში არასასურველი პირია, როგორც ჩანს. მიზეზი ეს იქნებოდა, მე სხვა მიზეზს ვერ ვხედავ”, – თქვა არქიმანდრიტმა.