ასლან ბჟანია: საქართველოს ხელმძღვანელობამ უნდა აღიაროს არსებული რეალობა
ბჟანიას ინტერვიუ ITAR-TASS-თან
აფხაზეთის პრეზიდენტმა ასლან ბჟანიამ ვრცელი ინტერვიუ მისცა რუსეთის სახელმწიფო საინფორმაციო სააგენტო ITAR-TASS-ს, რომელშიც მან განაცხადა, რომ აფხაზეთი დაინტერესებულია საქართველოსთან კეთილმეზობლური ურთიერთობებით და სურს შეუერთდეს რუსეთისა და ბელარუსის საკავშირო სახელმწიფოს.
გთავაზობთ ბჟანიას ინტერვიუს საკვანძო პუნქტებს.
- “კრემლის წინაშე აღებულმა ვალდებულებებმა ასლან ბჟანია ჩიხში შეიყვანა” – მოსაზრება
- „კატასტროფის თავიდან ასაცილებლად საჭიროა რეფორმები“ – მოსაზრება აფხაზეთის კრიზისის შესახებ
საქართველოსთან ურთიერთობის შესახებ
ბჟანიას თქმით, ბოლო წლებში, უკრაინაში ომის დაწყების შემდეგ, საქართველოს ხელისუფლებამ “ყველაფერზე პრაგმატული მიდგომა გამოიჩინა“.
“ბოლო რამდენიმე წელში, მას შემდეგ, რაც უკრაინაში სპეციალური სამხედრო ოპერაცია დაიწყო, საქართველოს ხელისუფლება, როგორც მე წარმომიდგენია, ყველაფრის მიმართ პრაგმატულ მიდგომას იჩენდნენ. ისინი არ ჩაებნენ პროვოკაციაში, რომელსაც მათ უკრაინა ახვევდა. უკრაინის ლიდერის არაერთ მოწოდებას, გაეხსნათ მეორე ფრონტი, მათი მხარდაჭერა არ მიუღია. ამ თვალსაზრისით ვთვლი, რომ ეს პოლიტიკური მომწიფების ნიშანია. მე ასე წარმომიდგენია.” – თქვა ბჟანიამ.
ბჟანია ამბობს, რომ აფხაზეთმა გადაწყვიტა თავისი მომავალი და საქართველოს ხელმძღვანელობას „მოუწევს არსებული რეალობის აღიარება“.
“მთლიანობაში, გვსურს საქართველოსთან კარგი, კეთილმეზობლური ურთიერთობა გვქონდეს. შემიძლია ვთქვა, რომ ქართველი ერის მიმართ არანაირი ანტაგონიზმი არ გაგვაჩნია. პრეტენზიები გვქონდა მათ მიმართ, ვინც ეს ომი წამოიწყო და მათ მიმართ, ვინც ამ ომში მონაწილეობა მიიღო. ამან ძირეულად შეცვალა ყველაფერი.
დღეს აფხაზეთი არის დამოუკიდებელი, რომლის დამოუკიდებლობას მხარს უჭერს რუსეთის ხელისუფლება და ხალხი. ჩვენ გვაქვს ჩვენი განვითარების გზა და მივყვებით მას.“ – განაცხადა ასლან ბჟანიამ.
- გალის რაიონის გამგებელი აფხაზეთში ქართველების პრობლემებზე საუბრობს. VIDEO
- “ნდობის აღდგენის საკითხებზე მსჯელობამ საჯარო სივრცეში უნდა გადაინაცვლოს”. ახალი პლატფორმა საქართველოში
აფხაზეთის რუსეთისა და ბელარუსის საკავშირო სახელმწიფოში შესვლის შესახებ
ბჟანიამ განაცხადა, რომ აფხაზეთს სურს რუსეთთან და ბელარუსთან ერთად იყოს საკავშირო სახელმწიფოში, რაც “ქვეყნისთვის” შესაფერისი ფორმატია:
“მაგრამ ჩვენ უნდა გავიაროთ გარკვეული ეტაპი, უნდა მომზადდეს რეგულაციები. ამ ყველაფერს შეიძლება დაახლოებით 5-10 წელი დასჭირდეს.
ეს გაერთიანება სასარგებლოა რუსეთის ფედერაციის, ბელარუსის და, რა თქმა უნდა, აფხაზეთის ხალხისთვის. ეს მოგვცემს საშუალებას, ერთი მხრივ, შევინარჩუნოთ ჩვენი იდენტობა და კულტურა, მეორე მხრივ კი განვითარდეს ჩვენი ქვეყანა. ვფიქრობ, რომ ასეთი ალიანსისკენ მუშაობა არის სწორი ვექტორი ჩვენი ურთიერთობების განვითარებისთვის.
ჩვენ დამოუკიდებლობა ძალიან ძვირი დაგვიჯდა და არ გვსურს ეს სტატუსი დავკარგოთ. ჩვენ გვინდა ვიყოთ სახელმწიფო, რომელსაც შეუძლია მონაწილეობა მიიღოს ინტეგრაციის პროცესებში ისეთ სახელმწიფოებთან ერთად, როგორიცაა რუსეთი და ბელარუსი.”
ენერგეტიკული კრიზისის შესახებ
აფხაზეთის პრეზიდენტი მიიჩნევს, რომ სოხუმმა უნდა მიიღოს ზომები საკუთარი ენერგორესურსების აღსადგენად, რათა დაძლიოს მუდმივი და გამწვავებული ენერგეტიკული კრიზისი. ასეთ ღონისძიებებად მან მაგალითისთვის ელექტროენერგიის მოხმარების ტარიფების გაზრდა დაასახელა:
“დღეს ჩვენ იძულებულნი ვართ გავზარდოთ ტარიფი და ავიყვანოთ ეკონომიკურად მისაღებ დონეზე. ეს ყველაფერი ეტაპობრივად განხორციელდება. იმისათვის, რომ აფხაზეთის ელექტრომრეწველობამ უპრობლემოდ იმუშაოს, მასში მნიშვნელოვანი თანხების ინვესტიცირებაა საჭირო. ჩვენს სახელმწიფოს არ ჰყავს ინვესტორები, თუმცა ჩვენ გავაგრძელებთ მოლაპარაკებებს, რათა მოვიზიდოთ უცხოური ინვესტიციები ინდუსტრიაში“.
უცხოური ინვესტიციები გულისხმობს, კერძოდ, რუსულ ინვესტიციებს. აფხაზურ საზოგადოებაში ეს იდეა ძირითადად ნეგატიურად აღიქმება, თუმცა ხელისუფლება აცხადებს, რომ სხვა გამოსავალი არ არის.
ამასთან, ბჟანიამ განაცხადა, რომ ენერგოუსაფრთხოების მისაღწევად აფხაზეთი რუსეთთან აწარმოებს მოლაპარაკებებს გაზიფიკაციის საკითხზე.
“წინასწარი გაზიფიკაციის პროექტი შემუშავდა და ამის შესახებ აფხაზეთის საზოგადოებამ იცის. გაზპრომის ქვეშ მყოფმა სტრუქტურამ მოამზადა გაზიფიკაციის სქემა. მთელი პროექტი გაზპრომის ხარჯზე უნდა განხორციელდეს – ეს არის ეკონომიკური და არა პოლიტიკური პროექტი.” – განაცხადა ბჟანიამ.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
